దేశ రాజధాని ఢిల్లీలోని ఇందిరాగాంధీ అంతర్జాతీయ విమానాశ్రయంలో (IGI Airport) మరోసారి సాంకేతిక సమస్య తలెత్తి విమాన రాకపోకలకు అంతరాయం కలిగించింది. శుక్రవారం ఉదయం ఎయిర్ ట్రాఫిక్ కంట్రోల్ (ATC) సిస్టమ్‌లో వచ్చిన సాంకేతిక లోపం కారణంగా పలు దేశీయ, అంతర్జాతీయ విమానాలు ఆలస్యంగా నడిచాయి. ఎయిర్ ఇండియా సహా ఇతర విమానయాన సంస్థల సర్వీసులు సగటున అరగంటకు పైగా ఆలస్యం కాగా, ప్రయాణికులు విమానాల్లోనే నిరీక్షించాల్సి వచ్చింది. కొన్ని విమానాలు రన్‌వేపై నిలిచిపోయి, టేక్ఆఫ్‌కి అనుమతి కోసం వేచి చూశాయి.
ఈ సమస్య కారణంగా విమానాశ్రయంలో పెద్ద ఎత్తున రద్దీ నెలకొంది. బోర్డింగ్ గేట్లు, చెక్-ఇన్ కౌంటర్ల వద్ద ప్రయాణికుల క్యూలు పెరిగిపోయాయి. ఎయిర్ ఇండియా విమానంలో ఉన్న ఒక ప్రయాణికుడు మాట్లాడుతూ, “మా విమానం రన్‌వేపై సుమారు అరగంటకు పైగా నిలిచిపోయింది. ఏటీసీ సిస్టమ్‌లో గ్లిచ్ వల్లే ఈ జాప్యం జరిగినట్లు సిబ్బంది తెలిపారు,” అని పేర్కొన్నారు. విమానాశ్రయ సాంకేతిక బృందాలు సమస్య పరిష్కారానికి యత్నిస్తున్నాయని, తక్షణమే కార్యకలాపాలు సాధారణ స్థితికి వస్తాయని అధికారులు భరోసా ఇచ్చారు.
ఆశ్చర్యకరంగా, ఇదే ఎయిర్‌పోర్ట్‌లో ఇలాంటి సాంకేతిక లోపం ఈ వారంలోనే రెండోసారి చోటుచేసుకుంది. కేవలం రెండు రోజుల క్రితం, బుధవారం కూడా ఇలాంటి సమస్య తలెత్తి విమానాల రాకపోకలు నిలిచిపోయాయి. ఆ సమయంలో ఎయిర్ ఇండియా థర్డ్ పార్టీ కనెక్టివిటీ నెట్‌వర్క్‌లో సమస్య తలెత్తిందని, దానివల్ల చెక్-ఇన్ సిస్టమ్‌లు ప్రభావితమయ్యాయని వెల్లడించింది. కొంతసేపటికి సమస్యను సరిచేసి కార్యకలాపాలను తిరిగి ప్రారంభించినట్లు ప్రకటించింది. అయితే, కేవలం రెండు రోజుల వ్యవధిలోనే మళ్లీ ఇలాంటి పరిస్థితి రావడం ప్రయాణికుల్లో అసహనాన్ని పెంచింది.
తాజా ఘటనపై ఇప్పటివరకు ఎయిర్‌లైన్స్ లేదా విమానాశ్రయ అధికారులు ఎటువంటి అధికారిక ప్రకటన విడుదల చేయలేదు. అయితే, విమానాశ్రయంలో సాంకేతిక బృందాలు ఏటీసీ సిస్టమ్‌ను రీసెట్‌ చేయడానికి ప్రయత్నాలు ముమ్మరం చేశాయి. వరుసగా సమస్యలు తలెత్తడం వల్ల ఢిల్లీ ఎయిర్‌పోర్ట్‌ సాంకేతిక వ్యవస్థల నాణ్యతపై ప్రశ్నలు తలెత్తుతున్నాయి. అధిక వాహన రద్దీ, డిజిటల్ సిస్టమ్‌లపై ఆధారపడే కార్యకలాపాల్లో ఇలాంటి లోపాలు తరచుగా వస్తే ప్రయాణికుల భద్రతకే ప్రమాదమని నిపుణులు హెచ్చరిస్తున్నారు. ఈ నేపథ్యంలో ఢిల్లీ ఎయిర్‌పోర్ట్‌ అధికారులు సమగ్ర సమీక్ష చేపట్టి, శాశ్వత పరిష్కారం కనుగొనాల్సిన అవసరం ఉందని పర్యవేక్షకులు సూచిస్తున్నారు.
