సావరిన్ గోల్డ్ బాండ్లలో (SGB) పెట్టుబడి పెట్టిన వారికి రిజర్వ్ బ్యాంక్ ఆఫ్ ఇండియా (RBI) మధురమైన శుభవార్త అందించింది. 2020-21 సిరీస్-I బాండ్లకు సంబంధించిన ముందస్తు విమోచన (ప్రీమెచ్యూర్ రిడెంప్షన్) ధరను ప్రకటించింది. ఒక్కో యూనిట్‌ (ఒక గ్రాము బంగారం) ధరను రూ.12,198గా నిర్ణయించినట్లు ఆర్బీఐ వెల్లడించింది. ఈ బాండ్లను రీడీమ్ చేసుకునేందుకు (నగదుగా మార్చుకోవడానికి) అక్టోబర్ 28 (మంగళవారం) నుంచి ఇన్వెస్టర్లకు అవకాశం కల్పించినట్లు స్పష్టం చేసింది.
ఈ సిరీస్ బాండ్లను మొదట జారీ చేసినప్పుడు ఆన్‌లైన్‌లో కొనుగోలు చేసిన వారికి ఒక్కో గ్రాముకు రూ.4,589కే లభించాయి. ఆఫ్‌లైన్‌లో కొన్నవారు రూ.4,639 చెల్లించారు. కేవలం ఐదేళ్లలోనే బంగారం విలువ గణనీయంగా పెరగడంతో, పెట్టుబడి దాదాపు మూడు రెట్లు పెరిగినట్టైంది. ఆన్‌లైన్ ఇన్వెస్టర్లకు సుమారు 166 శాతం లాభం లభించగా, ఆ కాలంలో సంవత్సరానికి 2.5 శాతం వడ్డీ కూడా పొందారు. మొత్తంగా చూస్తే ఈ SGB పథకం పెట్టుబడిదారులకు మంచి రాబడిని అందించినట్లయింది.
ఇండియా బులియన్ అండ్ జ్యువెలర్స్ అసోసియేషన్‌ (IBJA) ప్రకటించిన 999 స్వచ్ఛత కలిగిన బంగారం ధరల ఆధారంగా ఆర్బీఐ ఈ విమోచన ధరను లెక్కించింది. అక్టోబర్ 23, 24, 27 తేదీల్లో బంగారం ముగింపు ధరల సగటును తీసుకుని యూనిట్‌కు రూ.12,198గా నిర్ణయించారు. నిబంధనల ప్రకారం, బాండ్ జారీ చేసిన ఐదో సంవత్సరం తర్వాత వడ్డీ చెల్లింపు తేదీల్లోనే ముందస్తుగా విమోచన చేసుకునే అవకాశం ఉంటుంది. ఇది బంగారం ధరల పెరుగుదలతో పాటు పెట్టుబడిపై వడ్డీ రాబడిని పొందాలనుకునే వారికి చక్కటి ఆర్థిక అవకాశం.
ప్రజల పొదుపును ఆర్థిక ఆస్తుల వైపు మళ్లించి, బంగారం దిగుమతులను తగ్గించాలన్న ఉద్దేశంతో భారత ప్రభుత్వం 2015లో సావరిన్ గోల్డ్ బాండ్ పథకాన్ని ప్రారంభించింది. కేంద్రం తరఫున ఆర్బీఐ ఈ బాండ్లను జారీ చేస్తుంది. ఈ బాండ్ల కాలపరిమితి 8 సంవత్సరాలు కాగా, 5 సంవత్సరాల తర్వాత ముందస్తుగా రీడీమ్ చేసుకునే అవకాశం ఉంటుంది. వీటిని స్టాక్ ఎక్స్చేంజీలలో ట్రేడింగ్ చేయవచ్చు, ఇతరులకు బదిలీ చేయవచ్చు. అలాగే బ్యాంకు రుణాల కోసం హామీగా కూడా ఉపయోగించుకోవచ్చు. దీని వల్ల బంగారం కొనుగోలు చేయకుండానే బంగారం విలువ ఆధారిత పెట్టుబడి అవకాశాన్ని ప్రజలు పొందగలుగుతున్నారు.
