తమిళనాడులోని కరూర్ లో టీవీకే అధినేత, సినీ నటుడు విజయ్ నిర్వహించిన సభలో జరిగిన తొక్కిసలాట ప్రాణాంతక రూపం దాల్చింది. ఈ ఘటనలో ఇప్పటివరకు 33 మంది ప్రాణాలు కోల్పోగా, మరికొందరు ఆసుపత్రుల్లో చికిత్స పొందుతున్నారు. మరణించిన వారిలో మహిళలు, చిన్నారులు కూడా ఉండటంతో విషాదం మరింత తీవ్రతరం అయింది. ఆసుపత్రుల వద్ద మృతుల బంధువుల ఆర్తనాదాలు మిన్నంటుతున్నాయి. ఈ ఘటన రాష్ట్ర వ్యాప్తంగా కలకలం రేపింది.
తమిళ మీడియా రిపోర్టుల ప్రకారం విజయ్ సభలో తొక్కిసలాటకు ప్రధాన కారణం సమయపాలన లోపమేనని చెబుతున్నారు. విజయ్ రావాల్సిన సమయానికి రాకపోవడంతో అభిమానులు, కార్యకర్తలు గంటల తరబడి చిన్న స్థలంలో గుమిగూడారు. సుమారు 5-6 గంటల ఆలస్యంగా విజయ్ సభ ప్రాంగణానికి చేరుకున్నారు. ఆ సమయానికి వేడి, గుమికూడిన జనసమూహం, సరైన నియంత్రణ లేకపోవడం వల్ల ఒక్కసారిగా తొక్కిసలాట ప్రారంభమైంది. ఈ విషాదాన్ని తప్పించుకోవచ్చని, నిర్వాహకులు, పోలీసులు సరైన ఏర్పాట్లు చేయాల్సిందని విమర్శలు వినిపిస్తున్నాయి.
కరూర్ లో టీవీకే పార్టీ కార్నర్ మీటింగ్కు పోలీసులు 10 వేల మందికి మాత్రమే అనుమతి ఇచ్చారు. అయితే విజయ్ అభిమానులు, పార్టీ కార్యకర్తలు ఊహించని స్థాయిలో తరలివచ్చారు. సుమారు 2 లక్షల మంది సభ ప్రాంగణంలో, దాని వెలుపల గుమికూడటంతో స్థలం సరిపోలేదు. గాలి ఆడే పరిస్థితి లేకపోవడంతో ప్రజలు ఇరుక్కుపోయి బయటకు వెళ్లేందుకు ప్రయత్నించగా తొక్కిసలాట చోటుచేసుకుంది. ఒక్కసారిగా గుంపు అదుపు తప్పి, పలువురు అక్కడికక్కడే కుప్పకూలిపోయారు. అందులో కొందరు మహిళలు, చిన్నారులు ఉండటం విషాదాన్ని మరింత పెంచింది.
కరూర్ జిల్లా కలెక్టర్ తంగవేలు వెల్లడించిన వివరాల ప్రకారం తొక్కిసలాటలో మరణించిన వారిలో కనీసం ఆరుగురు చిన్నారులు ఉన్నారు. అలాగే పలు మహిళలు కూడా ఈ ఘటనలో ప్రాణాలు కోల్పోయారు. మరికొంతమంది తీవ్రంగా గాయపడి ఆసుపత్రుల్లో చికిత్స పొందుతున్నారు. ప్రభుత్వం గాయపడిన వారికి ఉత్తమ వైద్యసేవలు అందించాలని ముఖ్యమంత్రి ఎం.కే. స్టాలిన్ ఆదేశించారు.
ఈ ఘటనతో రాజకీయ వర్గాల్లో కొత్త చర్చ మొదలైంది. గతంలో హైదరాబాద్లో ‘పుష్ప-2’ ట్రైలర్ రిలీజ్ సందర్భంగా సంధ్య థియేటర్ వద్ద తొక్కిసలాట జరగగా, ఒక మహిళ మృతి చెందింది. ఆ ఘటనలో హీరో అల్లుఅర్జున్ను పోలీసులు అరెస్టు చేయడం అప్పట్లో సంచలనం రేపింది. తాజాగా కరూర్ సంఘటనలో 30 మందికిపైగా మృతులు ఉన్న నేపథ్యంలో నటుడు విజయ్పై కూడా చర్యలు తీసుకుంటారా? అనే ప్రశ్నలు రాజకీయ వర్గాల్లో చర్చకు దారి తీస్తున్నాయి. అయితే దీనిపై అధికారికంగా ఎటువంటి ప్రకటన వెలువడలేదు.
నిపుణులు, ప్రజా సంఘాలు చెబుతున్నట్లుగా ఈ తొక్కిసలాట పూర్తిగా నిర్లక్ష్యం వల్ల జరిగిందని స్పష్టమవుతోంది. పెద్ద ఎత్తున జనసమూహం వస్తుందని ముందుగానే అంచనా వేసి ఉంటే, పెద్ద వేదికలు, భద్రతా సిబ్బంది, క్రమబద్ధమైన ప్రవేశ ద్వారాలు ఏర్పాటు చేసి ఉండాలి. అలాగే సమయపాలన పాటించకుండా అభిమానులను గంటల తరబడి వేచి పెట్టడం పరిస్థితిని మరింత దిగజార్చిందని విశ్లేషకులు పేర్కొంటున్నారు.
ఈ ఘటన తమిళనాడంతటా కలకలం రేపింది. మృతుల కుటుంబాలకు ఆర్థిక సహాయం ప్రకటించాలని పలువురు డిమాండ్ చేస్తున్నారు. మరోవైపు టీవీకే పార్టీపై విమర్శలు వెల్లువెత్తుతున్నాయి. రాజకీయ ర్యాలీలు, సభల్లో ఇలాంటి ప్రమాదాలు జరగకుండా ఖచ్చితమైన మార్గదర్శకాలు ఉండాలని నిపుణులు సూచిస్తున్నారు. మొత్తం మీద, విజయ్ సభలో జరిగిన ఈ తొక్కిసలాట రాష్ట్ర ప్రజలను తీవ్ర విషాదంలో ముంచింది. అభిమానుల ఆనందాన్ని విషాదంగా మార్చిన ఈ ఘటనకు అసలు కారణం ఎవరు? అనే ప్రశ్నకు సమాధానం కోసం అందరూ ఎదురు చూస్తున్నారు.
