- శ్యామా ప్రసాద్ ముఖర్జీ గడ్డపై బీజేపీ అధికారం చేపట్టడం గొప్ప నివాళి అన్న పవన్..
- Politics: ఈ విజయం కార్యకర్తల దశాబ్దాల పోరాటానికి దక్కిన గౌరవమని వ్యాఖ్య..
Pawan Kalyan: పశ్చిమ బెంగాల్ నూతన ముఖ్యమంత్రిగా భారతీయ జనతా పార్టీ నాయకుడు సువేందు అధికారి బాధ్యతలు చేపట్టారు. రాజ్భవన్లో జరిగిన కార్యక్రమంలో ఆయనతో పాటు మరో ఐదుగురు మంత్రులుగా ప్రమాణస్వీకారం చేశారు. ఈ సందర్భంగా సువేందు అధికారికి ఆంధ్రప్రదేశ్ ఉప ముఖ్యమంత్రి పవన్ కల్యాణ్ హృదయపూర్వక శుభాకాంక్షలు తెలియజేశారు. పశ్చిమ బెంగాల్లో బీజేపీ సాధించిన ఈ విజయం కేవలం ఒక పార్టీ విజయం మాత్రమే కాదని, దీనిని భారత ప్రజల విజయంగా పవన్ కల్యాణ్ అభివర్ణించారు. ముఖ్యంగా భారతీయ జనసంఘ్ వ్యవస్థాపకులు శ్యామా ప్రసాద్ ముఖర్జీ జన్మించిన బెంగాల్ గడ్డపై, దశాబ్దాల పోరాటం తర్వాత ఆయన ఆశయాలకు అనుగుణంగా బీజేపీ అధికారంలోకి రావడం ముఖర్జీకి దక్కిన గొప్ప నివాళి అని ఆయన పేర్కొన్నారు. ఈ గెలుపు కార్యకర్తల అలుపెరుగని కృషికి దక్కిన గౌరవమని కొనియాడారు.
సరిహద్దు రాష్ట్రమైన పశ్చిమ బెంగాల్లో గత కొంతకాలంగా కొనసాగుతున్న అక్రమ వలసలు మరియు తీవ్రవాద చొరబాట్లు జాతీయ భద్రతకు పెద్ద ముప్పుగా మారాయని పవన్ కల్యాణ్ ఈ సందర్భంగా ఆందోళన వ్యక్తం చేశారు. సువేందు అధికారి నేతృత్వంలోని కొత్త ప్రభుత్వం ఈ సవాళ్లను సమర్థవంతంగా ఎదుర్కొని, దేశ భద్రతను పటిష్ఠం చేస్తుందని ఆయన ఆశాభావం వ్యక్తం చేశారు. గత ప్రభుత్వాల హయాంలో చోటుచేసుకున్న హింస మరియు అరాచకాలకు తావులేకుండా, రాష్ట్రంలో పారదర్శకమైన మరియు సుస్థిరమైన పాలన సాగాలని ఆయన ఆకాంక్షించారు. ప్రధాని నరేంద్ర మోదీ నాయకత్వంపై బెంగాల్ ప్రజలకున్న అచంచలమైన నమ్మకమే ఈ చారిత్రాత్మక విజయానికి బలమైన పునాది అని ఆయన స్పష్టం చేశారు.
ఈ విజయం సాధించడంలో కీలక పాత్ర పోషించిన కేంద్ర హోం మంత్రి అమిత్ షా, నితిన్ నబిన్ మరియు సమిక్ భట్టాచార్యలకు పవన్ కల్యాణ్ ప్రత్యేకంగా అభినందనలు తెలియజేశారు. రాష్ట్రంలో శాంతిభద్రతల పరిరక్షణతో పాటు అభివృద్ధి పథంలో బెంగాల్ దూసుకుపోవాలని ఆయన కోరుకున్నారు.
