హస్త కళాకారులకు అండగా టెక్నాలజీ.. ప్రభుత్వం వినూత్న చర్యలు..
హస్త కళల అమ్మకాల పెంపుకు ఏఐ ఆధారిత వ్యవస్థ..
ఆంధ్రప్రదేశ్లో హస్త కళలకు కొత్త ఊపు తీసుకురావడానికి కూటమి ప్రభుత్వం ఆధునిక సాంకేతికతను వినియోగిస్తోంది. సంప్రదాయ కళలను ప్రపంచానికి పరిచయం చేయడంతో పాటు హస్త కళాకారులకు గౌరవప్రదమైన జీవనం కల్పించాలనే లక్ష్యంతో ‘లేపాక్షి’ షోరూమ్లను సరికొత్త సాంకేతిక హంగులతో అభివృద్ధి చేయనుంది. రాష్ట్ర చేనేత, జౌళి శాఖ మంత్రి ఎస్.సవిత ఆధ్వర్యంలో ఈ దిశగా వినూత్న కార్యక్రమాలు చేపట్టారు.
హస్త కళారూపాలు కేవలం అలంకార వస్తువులు మాత్రమే కాకుండా ఆయా ప్రాంతాల సంస్కృతి, సంప్రదాయాలకు ప్రతీకలని మంత్రి సవిత పేర్కొన్నారు. తరతరాలుగా వస్తున్న ఈ కళలను కాపాడటం ప్రభుత్వ బాధ్యతగా భావిస్తున్నామని చెప్పారు. ప్రస్తుతం హస్త కళాకారులు సరైన మార్కెటింగ్, ప్రచారం లేక ఇబ్బందులు ఎదుర్కొంటున్న నేపథ్యంలో వారికి స్థిరమైన ఉపాధి కల్పించేందుకు ప్రభుత్వం ప్రత్యేక చర్యలు చేపట్టింది.
ఈ క్రమంలో ఆంధ్రప్రదేశ్ హ్యాండీక్రాఫ్ట్స్ డెవలప్మెంట్ కార్పొరేషన్ (ఏపీహెచ్డీసీ) ఆధ్వర్యంలో ‘తరంగా’ పేరుతో ఏఐ ఆధారిత రియల్టైమ్ కమాండ్ కంట్రోల్ వ్యవస్థను రూపొందించారు. రాష్ట్రవ్యాప్తంగా ఉన్న లేపాక్షి షోరూమ్ల నిర్వహణను ఇకపై రాష్ట్ర స్థాయి నుంచే పర్యవేక్షించనున్నారు. ప్రస్తుతం ఏపీహెచ్డీసీ పరిధిలో 19 లేపాక్షి షోరూమ్లు ఉండగా, అందులో 16 ఏపీలోనే ఉన్నాయి.
‘తరంగా’ వ్యవస్థ ద్వారా ప్రతిరోజూ షోరూమ్ల స్టాక్ వివరాలు, అమ్మకాలు, సిబ్బంది పనితీరు, వినియోగదారుల అభిరుచులు వంటి అంశాలను నేరుగా పర్యవేక్షించవచ్చు. ఏ ప్రాంతంలో ఏ కళారూపాలకు ఎక్కువ డిమాండ్ ఉందో గుర్తించి, అందుకు అనుగుణంగా సరఫరా చేయడానికి ఈ వ్యవస్థ సహాయపడుతుంది. అమ్మకాలు తగ్గిన షోరూమ్లపై ప్రత్యేక దృష్టి పెట్టి తగిన చర్యలు తీసుకునే అవకాశం ఉంటుంది.
ఈ వ్యవస్థలో ప్రత్యేకంగా అలెర్ట్ సదుపాయాన్ని కూడా ఏర్పాటు చేశారు. ఏ షోరూమ్లో స్టాక్ తక్కువగా ఉన్నా వెంటనే ఎరుపు లేదా ఆరెంజ్ అలెర్ట్ ద్వారా సమాచారం అందుతుంది. దీంతో అవసరమైన చోట త్వరగా సరఫరా చేయడం సులభమవుతుంది. ఒక ప్రాంతంలో ఎక్కువగా ఉన్న కళారూపాలను మరొక ప్రాంతానికి తరలించి అమ్మకాలు పెంచే అవకాశం కూడా ఉంటుంది.
ఇక వినియోగదారులకు మరింత చేరువ కావడానికి ‘కళాక్షి’ పేరుతో ప్రత్యేక వాట్సాప్ లింక్ను రూపొందించారు. ఏఐ ఆధారంగా పనిచేసే ఈ టూల్ ద్వారా హస్త కళల వివరాలు, వాటి తయారీ విధానం, సాంస్కృతిక నేపథ్యం, వాటిని తయారు చేసే కళాకారుల సమాచారం వినియోగదారులకు అందుతుంది. వినియోగదారులు తెలుగులో లేదా ఇంగ్లీషులో తమకు కావాల్సిన కళారూపం పేరు టైప్ చేస్తే కొన్ని సెకన్లలోనే పూర్తి సమాచారం అందుతుంది.
అంతేకాకుండా వాట్సాప్ ద్వారానే ఆర్డర్లు ఇచ్చే సౌకర్యాన్ని కూడా కల్పిస్తున్నారు. వినియోగదారులు ఇంటి వద్ద నుంచే తమకు నచ్చిన కళారూపాలను ఎంపిక చేసుకుని డోర్ డెలివరీ ద్వారా పొందగలుగుతారు. ఈ విధానం ద్వారా హస్త కళాకారులకు మరిన్ని ఆర్డర్లు లభించి వారి ఆదాయం పెరిగే అవకాశం ఉందని అధికారులు భావిస్తున్నారు.
మంత్రి సవిత మాట్లాడుతూ సీఎం చంద్రబాబు నాయకత్వంలో హస్త కళలకు విస్తృత ప్రాచుర్యం కల్పించడంతో పాటు కళాకారులకు ఏడాది పొడవునా ఉపాధి కల్పించాలనే సంకల్పంతో ఈ కార్యక్రమాలు చేపడుతున్నామని తెలిపారు. సంప్రదాయ కళలను ఆధునిక సాంకేతికతతో మిళితం చేసి ప్రపంచవ్యాప్తంగా మార్కెట్ కల్పించడమే ప్రభుత్వ లక్ష్యమన్నారు. ‘తరంగా’ మరియు ‘కళాక్షి’ వ్యవస్థల ద్వారా హస్త కళాకారుల జీవితాల్లో కొత్త వెలుగులు నింపగలమనే నమ్మకం వ్యక్తం చేశారు.
