సీజేపీపై అణిచివేత జరుగుతోందని అభిజిత్ దీప్కే ఆరోపణలు..
ఇన్స్టాగ్రామ్, ఎక్స్ ఖాతాలు బ్లాక్ చేశారంటూ సీజేపీ ఆగ్రహం..
సామాజిక మాధ్యమాల్లో తమ పార్టీ ఖాతాలు, వెబ్సైట్లు బ్లాక్ చేయడం వెనుక రాజకీయ ఒత్తిళ్లు ఉన్నాయని సీజేపీ (కాక్రోచ్ జనతా పార్టీ) వ్యవస్థాపకుడు అభిజిత్ దీప్కే ఆరోపించారు. తనకు ప్రాణహాని ఉందని పేర్కొంటూ, గత కొంతకాలంగా నిరంతరం బెదిరింపు సందేశాలు వస్తున్నాయని ఆయన వెల్లడించారు.
అభిజిత్ దీప్కే మాట్లాడుతూ, “కాక్రోచ్ జనతా పార్టీపై తీవ్రమైన అణిచివేత జరుగుతోంది. ప్రజల సమస్యలపై ప్రశ్నలు అడుగుతున్నందుకే మమ్మల్ని లక్ష్యంగా చేసుకుంటున్నారు” అని అన్నారు. పార్టీ అధికారిక ఇన్స్టాగ్రామ్, ఎక్స్ (ట్విట్టర్) ఖాతాలను బ్లాక్ చేశారని, అంతేకాకుండా సోషల్ మీడియా బ్యాకప్ అకౌంట్లు, పార్టీకి సంబంధించిన వెబ్సైట్లు కూడా నిలిపివేశారని తెలిపారు.
నీట్ పేపర్ లీక్ కేసును ప్రస్తావించిన ఆయన, “ఈ వ్యవహారంలో సంబంధిత మంత్రిపై ఎలాంటి చర్యలు తీసుకోవడం లేదు. కానీ జవాబు కోరుతున్న మా పార్టీపై మాత్రం చర్యలు తీసుకుంటున్నారు” అంటూ విమర్శించారు. ప్రజాస్వామ్యంలో ప్రశ్నించడం తప్పా అని ఆయన ప్రశ్నించారు.
తమ వెబ్సైట్ బ్లాక్ అయ్యేలోపే దాదాపు 10 లక్షల మంది సభ్యులు పార్టీలో చేరారని అభిజిత్ దీప్కే వెల్లడించారు. యువత, సామాన్య ప్రజల నుంచి మంచి మద్దతు లభిస్తోందని, అందుకే తమ గొంతును అణచివేయడానికి ప్రయత్నాలు జరుగుతున్నాయని ఆరోపించారు.
ఈ ఘటనపై సోషల్ మీడియాలో కూడా విభిన్న అభిప్రాయాలు వ్యక్తమవుతున్నాయి. కొందరు అభిజిత్ దీప్కే ఆరోపణలకు మద్దతు తెలుపుతుండగా, మరికొందరు దీనిపై పూర్తి స్థాయి విచారణ జరగాలని కోరుతున్నారు.
