గ్లోబల్ స్టార్ రామ్ చరణ్ నటిస్తున్న అత్యంత ప్రతిష్టాత్మక చిత్రం ‘పెద్ది’ నుంచి విడుదలైన తొలి పాట ‘చికిరి చికిరి’ ఇప్పటికే కొత్త రికార్డు సృష్టించింది. విడుదలైన గంటల్లోనే ఈ పాట సోషల్ మీడియా ప్లాట్ఫామ్లను కుదిపేసింది. అద్భుతమైన విజువల్స్, ఎమోషన్, డ్యాన్సింగ్ ఎనర్జీతో ప్రేక్షకులను అలరించిన ఈ పాట కేవలం కొన్ని గంటల్లోనే 32 మిలియన్ల వ్యూస్ సాధించింది. అన్ని భాషల్లో కలిపి 46 మిలియన్లకు పైగా వ్యూస్ సాధించి, భారత సినీ చరిత్రలో అత్యంత వేగంగా వీక్షణలు సాధించిన పాటగా నిలిచింది. ఈ విజయంతో మెగా అభిమానులు సోషల్ మీడియా అంతా సంబరాలు జరుపుతున్నారు.
‘ఉప్పెన’ ఫేమ్ బుచ్చిబాబు సానా దర్శకత్వంలో తెరకెక్కుతున్న ఈ చిత్రం మొదటి నుంచే భారీ అంచనాలు సృష్టించింది. కథా బలం, సంగీతం, తారాగణం — అన్ని అంశాలూ సూపర్ హిట్ సినిమాకి కావాల్సిన ఫార్ములానే ఉన్నాయనే బజ్ క్రియేట్ అయింది. అంతేకాదు, ఈ సినిమాకు సంగీతాన్ని అందిస్తున్నది స్వయంగా సంగీత మాంత్రికుడు ఏ.ఆర్. రెహమాన్ కావడంతో అంచనాలు మరింత ఎగసిపడ్డాయి. రామ్ చరణ్, బుచ్చిబాబు, రెహమాన్ ముగ్గురి కలయికలో వచ్చిన మొదటి పాటకే ప్రేక్షకుల నుంచి ఇంత విపరీతమైన స్పందన రావడం చిత్ర బృందానికే కాక, టాలీవుడ్కే గర్వకారణం అయ్యింది.
‘చికిరి చికిరి’ పాటలో రామ్ చరణ్ ఎనర్జీ, డ్యాన్స్ మూవ్స్ ప్రత్యేక ఆకర్షణగా నిలిచాయి. పాట విజువల్స్ సాంకేతికంగా అద్భుతంగా ఉన్నాయని సినీ విశ్లేషకులు పేర్కొంటున్నారు. పాటలోని వర్ణరంజిత సెట్లు, భిన్నమైన కొరియోగ్రఫీ, సంప్రదాయ తాకిడి ఉన్న బీట్లు ప్రేక్షకుల మనసును దోచుకున్నాయి. ఈ పాట ప్రస్తుతానికి యూట్యూబ్, స్పాటిఫై, జియోసావన్, అపిల్ మ్యూజిక్ వంటి అన్ని ప్లాట్ఫామ్లలో ట్రెండింగ్లో ఉంది.
మైత్రీ మూవీ మేకర్స్, వృద్ధి సినిమాస్, సుకుమార్ రైటింగ్స్ పతాకాలపై వెంకట సతీష్ కిలారు నిర్మిస్తున్న ఈ భారీ బడ్జెట్ చిత్రం లో జాన్వీ కపూర్ హీరోయిన్గా నటిస్తోంది. అలాగే శివ రాజ్కుమార్, జగపతి బాబు, దివ్యేందు కీలక పాత్రల్లో కనిపించనున్నారు. సినిమాటోగ్రఫీని రత్నవేలు అందిస్తున్నారు. సినిమా ప్రస్తుతం భారీ స్థాయిలో షూటింగ్ జరుపుకుంటోంది. నిర్మాతలు ఇప్పటికే ఈ సినిమాను 2026 మార్చి 27న ప్రపంచవ్యాప్తంగా విడుదల చేయనున్నట్లు ప్రకటించారు. మొదటి పాటతోనే సృష్టించిన ఈ రికార్డులతో ‘పెద్ది’పై అంచనాలు మరింత పెరిగిపోయాయి.
